Fact Findin' Tour o' the Aist Ards region: Bit Twa

As Wee Daftie correctly pointed oot in oor Hoke Oot column in the side bit, there his indaid bin a chronic lack o' postin' o' late. This is, howiver, nathin' til dae wi' Mafia Wars, it is doon til ma jet set lifestyle laidin' til a shortage o' interweb access. Ah kin hardly update the blog in ma wurk, fur nat oany micht ah be caucht at it by herrsel, ah'd be hard pushed tae drink the required amount o' mental lubrication wi'oot bein' spatted.

Thus it is nat til taenicht thit ah bring yis Bit Twa o' ma fact findin' report frae the Ards. Last time we lukked at Ballywalter, taenicht we skip oot Ballyhalbert itself, an' hap doon til Portavogie. Whit daes the Sandy Row o' the Ards bring til the City o' Culture table?

Portavogie.

Provision o' Swings.

Wait til yis see this: Portavogie his nat yin, bit twa sets o' swings, providin' ample opportunity fur wains til fall frae grate heichts. Ah'm nat sure why there is twa sets o' swings, fur there nae distance frae eacho'er, a kin oany assume some kind o' Playpark related vote catching by the council, though the under sixes canny vote (usually.)

Swings yin: Note large grass area, guid toilet access.

Swings Twa: Less stuff, an' apparently fur smaller wains. Quite handy fur the Chinese if yer hungry.

Provision o' toilets:
A guid unit, convenient til both swings, carpark an' grass.

Provision o' Orange Halls:

Ah furgat tae take a photae, but, as yid expect, there is yin.

Provision o' o'er things:

Portavogie is comin' doon wi' o'er things, essential fur oany Cultural Bid:

Public Art: Portavogie is rich in public art. Yung folk are encouraged fur tae express thar innermaist feelings, regardless o' talent, givin' the village some o' the finest array o' painted things in Ulster. This includes madurn art, whereby the thing painted bears oany a passin' resemblence til whit its meant til be. In the example belaw ah think its meant til be a hand.

The artistic community o' Portavogie hiv taken an unusual luk at traditional artisitic crafts, deconstructing the wall murial til revail it in a new form - the road murial. This requires less ladders, fur its wile windy. There are no grey kerbs in Portavogie.

Guest Hoose accomodation:

The aforementioned Wong's Royalle, Chinese takeaway come traditional guest hoose.

Friendly Taxi Folk.

Ah noticed this sign in a taxi windae by the Mace. He disnae mean it, fur ah did a small poo on the bonnet an' he niver even noticed.